Бүген 1 Май мәйданындагы герой-шагыйрь Муса Җәлил һәйкәленә татар җәмәгатьчелеге чәчәкләр салды

15 февраль 2019 ел., җомга

Габдулла Кариев исемендәге Казан татар дәүләт яшь тамашачы театрының баш хореографы, быелгы Муса Җәлил премиясе лауреаты Нурбәк Батулла Муса Җәлил һәйкәленә чәчәкләрне балачактан бирле салуын әйтте. Бу хакта ул “Татар-информ” хәбәрчесенә җиткерде. Бүген ул Муса Җәлил һәйкәленә чәчәк салу чарасында катнашты.

“Муса Җәлил кешелекле, ихлас, үзенең мәсләкләренә тугры кеше булган. Аның һәйкәленә чәчәкләрне балачактан бирле салам”, - диде Нурбәк Батулла.

Бүген 1 Май мәйданындагы герой-шагыйрь Муса Җәлил һәйкәленә татар җәмәгатьчелеге чәчәкләр салды.

Чарада ТР Язучылар берлеге рәисе Данил Салихов, шагыйрьләр һәм язучылар Рәмис Аймәт, Галимҗан Гыйльманов, Ренат Харис, Разил Вәлиев катнашты. Бөтендөнья татар конгрессы башкарма комитеты рәисенең беренче урынбасары Данис Шакиров һәм ТР мәдәният министрлыгыннан вәкилләр бар иде.

Шулай ук герой-шагыйрьнең иҗатын сөюче татар галимнәре, артистлар, студентлар, “I Халыкара “Җәлил укулары” бәйгесендә җиңүче укучылар чарада катнаштылар.

"Татар-информ"

Фото: Салават Камалетдинов

 

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования